Donsku heilsumyndugleikarnir hava staðfest, at ein seks ára gomul genta er smittað við teirri vandamiklu tarmbakteriuni VTEC. Statens Serum Institut sigur, at gentan er vorðin smittað eftir at hava verið í sambandi við eitt skyldfólk, sum hevur tikið smittuna við sær úr Týsklandi.
Hetta er fyrstu ferð, at eitt barn í Danmark er smittað við VTEC-bakteriuni.
Statens Serum Institut sigur, at higartil eru 25 danir smittaðir við VTEC-tarmbakteriuni. Talan er um 12 menn og 13 kvinnur í aldrinum 6 til 81 ár. 10 hava fingið trupulleikar við nýrunum.
