Hetta er 16. ferð at tiltakið er á skrá. Frá at vera eitt lítið hugnatiltak við nøkrum fáum básum við djórum, er hetta vaksið til at vera tað helst størsta tiltakið her á landið, ið er beinleiðis evnað til at vera til børn og barnsligar sálir. Børn koma hesar báðar dagar, úr øllum herðashornum í landinum. Summi koma sjálvi, summi við foreldrum og aftur onnur við ommum og abbum. Tað sum er felags fyri øll, er at tey vanliga hava eina sera hugnaliga løtu saman.
Hesir báðir dagarnar fáa børnini høvið at koma í samband við tey djór, ið tey annars ikki hava høvið at síggja í dagligdegnum. Her eru neyt, gæs, dunnur, ross, hundar umframt nógva annað, m.a. nøkur eksotisk djórasløg ið heilt sjáldan eru at síggja. Nógvar áhugaverdar framførslur vera eisini, m. a. vísa reiðfólk síni evnir á rossabaki. Sjálvandi er eisini kaffisøla, hoppiborgir og so tað sum børnini vanliga gleða seg mest til, nemliga tað at sleppa til ponyríðing. Tað munna vera nógv børn ið hava verið fyrstu ferð á rossabakið til hetta tiltak. Summi av teimum hava fingið brell og hava nú sína dagligu gongd, á felagsøkinum hjá Føroya Ríðingarfelag úti í Havnardali.
