Ein kanning skal avdúka, hvat veruliga fór fram í sambandi við uppsøgnina av landsverkfrøðinginum fyri jól 1998.
Hetta er ein av niðurstøðunum hjá teimum sjey deildarleiðarunum á LV, ið saman við starvsfólkunum hava skrivað og savnað skjalatilfar í 166 síðurs drúgvari frágreiðing, sum varð handað løgmanni Anfinn Kallsberg hósdagin.
Leiðararnir staðfesta, at eftir uppsøgnina eru LV komið úr einari góðari ringrás inn í eina ónda ringrás.
Leiðararnir staðfesta, at "tað er hevur týdning, at tamarhald fæst á manipulerandi kreftum", samstundis leggja teir dent á, at málið hjá landsstýrinum um rationalisering "bert kann gerast saman við medarbeiðarunum."
Stríðið millum Vinnumálastýrið og LV verður ikki beinleiðis nevnt. Men summir setningar kunnu illa misskiljast:
"Hóast tíðin síðani jólahalguna 1998 á so mangan hátt hevur verið øðrvísi enn tíðin beint frammanundan, so vísir hon, at tað er sannlíkt, at ein nýggjur og eins góður landsverkfrøðingur (stjóri) og tann farni vil fáa somu samstarvstrupulleikar, tí tey fyrisitingarligu politisku virðini á stovninum eru ikki í samljóði við onnur virði í pørtum av almennu fyrisitingini."
Henda ónavngivna, men kortini beinleiðis heilsanin til Vinnumálastýrið, fær deildarleiðararnar at víðari at staðfesta, at "tað er heldur ikki sannlíkt, at ein nýggjur og eins góður landsverkfrøðingur (stjóri) undir øðrum organisatoriskum skipanum, men uttan eina viðgerð av tí, sum hendi á jólum 1998, vil loysa nakran trupulleika í longdini."
Stovnsleiðararnir meta haraftrat eisin, at uppsøgnin av Henningi Jacobsen framvegis stendur sum ein forðing fyri at koma víðari við politiska málsetninginum um at rationalisera LV. Teir vísa somuleiðis til, at í kjalarvørrinum á jólastríðnum eru eisini møguleikar skaptir "fyri eini skipaðari rationalisering á stovninum og í tí almennu fyrisitingini annars."
