Dansa aftur í Eysturoy

Í kvøld byrjar dansi­veturin hjá Eysturoyar Dans­ifelag.

Eysturoyar dansifelag er eitt felag, sum hevur limir úr all­ari oynni og aðrastaðni við. Tað eru umleið 160 limir, harav einir 70 limir eru aktivir hvønn vet­ur.

Ógvuliga fjølbroytt er, hvat verð­ur havt á gólvi, kent sum minni kent: kvæðir, vísur og tætt­ir. Nógvir ymiskir skiparar eru, og tí hevur dansurin ógv­u­liga ymiskt lag tey ymsu kvøld­ini. Og tað ger dansin bæði liv­andi og spennandi.

- Eitt av okk­ara málum er at hjúkla um tað, sum hevur verið livandi av før­oysk­um dansi í Eysturoynni. Tí eru ofta vísur, ið eru kendar í áv­ís­um bygdum, á skránni. Tær kunnu vera bæði føroyskar og danskar, bæði skemtiligar og álvarsamar, sigur Eysturoyar Dansifelag.

Dansað verður hvørt fríggja­kvøld (sum oftast) í Hæddini, Salt­ang­ará, frá klokkan 21.00 til 24.00. Mangt ymiskt er á skránni, so ymiskt, at ein og hvør kann vera við. Eisini er hugs­að um hugnan at vera sam­an, tí hvørt kvøld steðga tey á og og njóta ein drekkamunn, með­an prátið gongur.

Skrá er gjørd fyri veturin, og hon er at síggja á heimasíðuni hjá felagnum: www.eystdans.dk. Á skránni sæst eisini, hvar und­antøk eru, har ikki verður dansað fríggjakvøld í Hæddini.

- Hesi undantøk kunnu vera, at vit eru gestir aðrastaðni, ella at vit eru vertir fyri øðrum dans­i­feløgum, sigur Eysturoyar Dansifelag.

Sum nakað nýtt á skránni í ár hevur felagið sett nøkur kvøld at byrja við barnadansi. Tey kvøld­ini verður byrjað klokkan 20.00. Fel­ag­ið vil á hendan hátt stuðla tí ar­beiði, ið fleiri skúlar gera við at halda føroyskum dansi og kvæð­a­ment­an í hevd. Øll eru væl­kom­in, limir ella ikki.

Eysturoyar Dansifelag vil tí feg­ið bjóða øllum, ið hava hug til at dansa føroyskan dans, at vera vælkomin inn á gólvið eitt van­ligt fríggjakvøld. Um onkur so hev­ur hug at gerast limur, er lima­gjaldið fyri veturin 100 krónur.