Tá Danmark keypir koppingarevni fer eitt prosent til Føroya og eitt prosent til Grønland. Um tað eisini er galdandi í hesum føri, so fáa Føroyar 11.100 skamtir fleiri, enn ætlanin annars sigur.
Tí Danmark hevur við eini avtalu við Rumenia keypt yvir 1,1 milliónir skamtir av Pfizer-koppingarevni. Og fór teir 11.100 skamtirnir til fyrra prikið hjá teimum í Føroyum, sum enn ikki eru koppsett, so vóru øll, sum skulu koppsetast, koppsett fyrru ferð. Nú hava 28.060 fingið fyrra prikið. Tilsamans skulu umleið 38.000 fólk í Føroyum koppsetast, um øll yvir 16 ár verða koppsett.
Tað upplýsir Heilsumálaráðið í tíðindaskrivi í kvøld.
Orsøkin til, at tað ber til at fáa hesar skamtir úr Rumenia er, at undirtøkan fyri koppseting í landinum er so vánalig, sigur ráðið.
Statens Serum Institutt, sum stendur fyri keypinum og útbreiðsluni av koppingarevni, væntar, at fyrstu skamtirnir koma til Danmark í vikuni.
Heilsustýrið fer tí at dagføra kalendaran fyri koppsetingar positiva vegin.
Fyrr í dag skrivar DR, at tíðindini um keypið av koppingarevnium komu úr einum brævið frá Heilsumálaráðnum til framsøgufólkini í heilsumálum, skrivar Ritzau tíðindastovan.
