Danir bjóða sær nú at hjálpa føroyingum, skuldi tað hent, at føroyskir myndugleikar gera av at taka ímóti flóttafólki úr Kosovo. Á fundi í Keypmannahavn í gjár millum Torkild Simonsen, innanríkisráðharra, og Anfinn Kallsberg, løgmann, beyð danski ráðharrin sær til at hjálpa føroyingum við ráðum o. ø. í sambandi við flóttafólkamálið.
Tað var Torkild Simonsen, sum hevði biðið um fundin, har hann kom við einum tilboð um at geva føroyingum góð ráð og vitan um teirra royndir á hesum øki.
Anfinn Kallsberg, løgmaður, sigur, at tað er upp til okkum, hvat vit ynskja av hjálp í so máta. Danir leggja seg ikki út í, hvussu og um vit taka ímóti flóttafólki.
Landsstýrið hevur ikki tikið nakra endaliga støðu í málinum, men arbeiðir við tí, sum flokkarnir á tingi komu ásamt um.
