Dahl ynskir Grønlandi góða eydnu við oljuleiting

Nuuk: Hósdagurin 2. de­semb­er kann gerast eitt týðandi vegamót í roynd­un­um hjá Grønlandi at ger­ast framtíðar oljutjóð. Tá fer Ráevnisfyrisitingin í Nuuk at lata tilsamans sjey altjóða oljufeløgum 14 nýggj leitiloyvi í Baffin Flógvanum í Vesturgrønlandi. Fleiri av oddafólkunum hjá hes­um oljufeløgum fara at taka ímóti loyvunum á ein­um hátíðarhaldi í Nuuk seinna­partin hósdagin. Millum um­boðini fyri oljufeløgini verða m.a ovastu stjórarnir fyri altjóða leiting hjá Shell og Statoil og ber hetta boð um, hvussu stóran týdn­ing nøkur av heimsins stóru oljufeløgum leggja í leit­ing­ina í Grønlandi.
Eisini í Føroyum verður fylgt væl við oljutilgongdini hjá grannanum fyri norðan, nú fleiri av oljufeløgunum, sum leita eftir kolvetnum í føroysku undirgrundini, eis­ini eru við í leitingini í Grønlandi. Johan Dahl, lands­stýrismaður í olju­mál­um er millum teirra, sum fylgja gongdini í Grønlandi neyvt.
– Í Føroyum eru vit fegin um tann stóra áhuga, ið oljuleitingarvirksemið í Grønlandi hevur fingið. Við fleiri stórum altjóða feløgum, sum loyvishavarar, hevur Grønland gott útgangsstøði fyri dyggum leitivirksemi sigur hann. Men hann dylur ikki fyri, at hann heldur tað var spell, at føroyska felagið, sum søkti um loyvi, ikki var millum tey útvaldu.
– At Føroya Kolvetni ikki hevði eydnuna við sær hesuferð var spell, men sjálvandi virða vit av­gerð­ina hjá grønlendska lands­stýrinum.
Johan Dahl sigur víðari, at Grønland og Føroyar eru á ymiskan hátt í sama báti, tá tað um oljuleiting ræður. Nevnast kann t.d. at bæði londini eru lutfalsliga nýggj í hesi vinnuni, samfeløgini eru smá, so árin frá møguligari kolvetnisframleiðslu verða stór.
– Almennu fyrisiting­ar­nar eru smáar, veit­ing­ar­fyri­tøkurnar í báðum lond­unum eru smáar, men vilja fegnar hava møguleika at veita vørur og tænastur til oljuvinnuna, so tað eru iva­leyst møguleikar fyri, at vit kunnu njóta gott av hvørjum øðrum, skuldi áhugi verið fyri tí.
Tað eru eisini ymisk við­urskifti, sum ikki eru skip­að eins í Føroyum og í Grøn­landi. Tað kundi eis­ini verið áhugavert at um­røtt hesi viðurskiftini part­anna millum sigur lands­stýrismaðurin.
– Eg ætli mær at seta meg í samband við mín starvs­felaga í Grønlandi fyri at fáa umrøtt spurningin um nærri samstarv, bæði tá tað snýr seg um veitingar til hesa nýggju vinnuna og um sjálvt leitivirksemið.
Fyrisitingarnar í Føroyum, Grønlandi og Danmark hitt­ast umleið annaðhvørt ár at tosa um felags áhugamál, og er hetta eisini eitt forum, har møguleikarnir fyri nærri samstarvi kunnu umrøðast.
Eg vil ynskja Grønlandi góða eydnu við víðari leiti­virksemi, og at tað skal eydnast teimum at upp­byggja eina nýggja vinnu landi teirra at frama sigur Johan Dahl at enda.