Hetta er tíðin, tá menn plagdu at ræna nátaegg í bjørgunum, og í Sandoynni livir hesin siður framvegis.
Veðrið í morgun er av tí fagrasta, og longu tíðliga í morgun vóru menn á Sandi á fótum og riggaðu til at fara at ræna í bjørgunum vestan fyri á Sandoynni.
Sum In.fo skilir, verður farið at ræna í tveimum bólkum í dag. Nakrir mans, sum plaga at ræna nátaegg stutt undir upsini, verða norðari vestan fyri á Sandoynni.
Teir, sum plaga at ræna Lonina, hava eisini riggað til at fara avstað í morgun. Í Lonini brúka teir spæl, har fólk verða lorað niður í Lonina.
Bergið vestan fyri á Sandoynni er um hesar leiðir umleið 300 metrar høgt, og tað skulu rímiliga góðir nervar til at verða við í ræningini.
In.fo fer seinni at venda aftur til, hvussu dagurin fer at hildnast hjá teimum, sum í dag eru farnir at ræna nátaegg í Sandoynni.
