Dan Brown er vorðin kendur um allan heimin fyri bókina um Da Vinci-loyndarmálið, men rithøvundarnir Richard Leigh og Michael Baigent vilja vera við, at hann hevur stolið hugskotið frá teimum, og at innihaldið í bókini byggir á upplýsingar, sum teir báðir hava brúkt sjey ár um at kanna.
Teir hava tí stevnt forlagnum hjá Dan Brown eftir meiri enn 100 milliónum krónum í endurgjaldi. Forlagið noktar at gjalda endurgjald, og Dan Brown vil einki siga, og tí skal málið nú í hægstarætt. Har sleppur Dan Brown helst at svara fyri seg, tí roknað verður við, at hann verður avhoyrdur í rættinum.
Fyrr hevur Dan Brown sagt, at hann fekk hugskotið til bókina, tá hann var og vitjaði í Sevilla í Spania, har hann hoyrdi ein professara greiða frá málninginum Tann seinasta máltíðin hjá Leonardo da Vinci.
