Mest sannlíkt er slitið íkomið av skeljafiskarum, sum dreggja sunnan fyri Orkneyoyggjarnar.
Brekið á Shefa-kaðalinum er bert eitt av fleiri, sum eru hend í økinum sunnan fyri Orkney, og talan er um trupulleika, sum tey á Føroya Tele í fleiri ár hava arbeitt við at loysa.
Shefa-kaðalin gongur nevnliga ígjøgnum eitt øki, har skeljafiskarar veiða um hesa árstíðina, og javnan eru slit íkomin, tá dreggjað er eftir skeljum.
- Nú er hetta slitið somikið nýtt, og tí kann eg ikki her og nú staðfesta, at talan er um slit av hesum ávum, men tað er rætt, at hetta ofta hevur verið atvoldin, sigur Páll Vesturbú, stjóri á FT Net.
Talan er um stóra útreiðslu, hvørja ferð slit er á kaðalinum. Kostnaðurin fyri at umvæla slík slit liggur um einar tvær milliónir hvørja ferð, og tí hevur Føroya Tele lagt nógv fyri í royndunum at tryggja kaðalin.
– Vit hava eitt gott samskifti við myndugleikar í Orkney, men talan er eisini um skip aðrastaðni úr Bretlandi, og hesi eru ikki eins væl vitandi um vandan, sum lokalu skeljafiskararnir eru. Hartil arbeiða vit eisini við at tryggja kaðalin betur.
Eitt nú við at leggja grót oman á kaðalin, har hann liggur eftir havbotninum. Talan kann eisini verða um at leggja sjálvan kaðalin øðrvísi, men hetta er ikki nakað løtuverk, sigur Páll Vesturbú.
