Tað hevur verið ein sera turbulent vika hjá Manchester City við rumbli um Carlos Tevez, sum vildi sleppa burtur úr felagnum og enntá hótti við at steðga fótbóltskarrieruni.
Men í dag tók Tevez so transfer umbønina aftur, og so skuldi friður valda í felagnum. Og við »the prodigal son« aftur sum felagsmanni stóð City við sera góðum kortum at vinna dystin móti Everton og harvið leggja seg á odda í Premier League.
Men tað gingu minni enn 20 minuttir, so var City aftanfyri 0-2, og sjálvt um teir høvdu so at siga alt spælið í dystinum, og sjálvt um Phil Jagielka gjørdi sjálvmál í seinna hálvleiki, so vann Everton dystin 2-1.
Skjótu málini, sum Tim Cahill og Leighton Baines gjørdu, vóru nóg mikið til, at Everton, sum bert lá á 15. plássi, vann dystin.
