B68 hevur 26 stig, og ÍF hevur 25 stig. Bæði liðini kenna tað framvegis brenna undir sær, og bæði liðini eiga framvegis á at spæla ímóti 07 Vestur, sum er favorittur at flyta niður.
Trý stig í oyggjauppgerðini á Svangaskarði seinnapartin kunnu bera rættin at halda fram í bestu deildini við sær.
Um metast skal út frá fyrr í ár, so eru fuglfirðingar favorittar. ÍF vann í fyrsta umfari 4-3 á Toftum, og tveir dagar undan Ólavsøku vann ÍF 3-1 á heimavølli ímóti B68.
Hjá B68 er Remi Langgaard tøkur aftur, eftir at hann var leikbannaður í Klaksvík. Hesa ferð er Jóhan Dávur Højgaard leikbannaður. Venjarin, Bill Jacobsen, var í síðstu viku í Aalborg saman við André Olsen hjá B68 og Karl Løkin og Dánjali á Lakjuni hjá ÍF og hinum á U-21 landsliðnum.
Stóri spurningurin í Fuglafirði er, um Chris Muomaife verður førur fyri at spæla. Hann hevur ikki vant nakað serligt, men teir vóna, at hann verður við, og tað er ikki so undarligt, at fuglfirðingarnir seta sítt álit á Chris. Hann hevur í fimtan dystum skorað tólv mál, og millum hesi teljast fýra ímóti B68!
Allir hinir ÍF spælararnir eru tøkir.
