Tað er kostnaðarmikið at gera seg út til at vera við í einum oljuævintýri. Tí hevur føroyska veitingarfelagið P/F Havborg Supply í fyrstu atløgu gjørt av at leiga sína útgerð.
Veitingarskipið, Havila Charisma, sum fríggjakvøldið fyrstu ferð fór av Runavík út til føroyska boriøkið við vøru, kostaði heilar 300 milliónir at byggja.
Havborg Supply hevur gjørt samstarvsavtalu við norska reiðaríið Havila, ið millum annað inniber, at føroyska felagið rekur risastóra norska skipið.
? Slík veitingarskip eru so kostnaðarmikil, at tað er ikki hugsingur um at byggja sær eitt, meðan vit enn eru á leitingarstøði. Tí hava vit gjørt avtalu við Havila. Men kemur tað so langt, at olja verður funnin, og vit fáa ein langtíðarsáttmála, fara vit sjálvandi at hugsa um at keypa skip, sigur Hans Albert Hansen, dagligur leiðari hjá Havborg Supply Service.
Avtalu við Statoil
Havborg Supply Service hevur gjørt fasta avtalu við Statoil, um at Havila Charisma skal vera í tænstu hjá Suvereign Explorer so leingi royndarboringin í Føroyskum øki varir. Skipið skal sostatt sigla í fastari rutu millum Runavík og boriðpallin. Roknað verður við, at tað fer at gera millum tveir og tríggjar túrar millum útgerðarhavnina og boripallin um vikuna.
Havila Charisma er væl egnað til uppgávuna. Tað hevur stórt dekk, ið ger, at tað kann flyta nógvar og stórar lutir út til boripallin. Eisini er tað útgjørt, so tað kann fáast við akkershandling, eins og tað kann virka sum bjargingarskip.
Havila Charisma er 73,6 metrar langt, 16,4 metrar breitt, tað stingur 6,9 metrar, tað er 25.900 bruttoregistartons til støddar, tað hevur eina maskinorku á knappar 17 túsund hestar og ábyrgdina av hesum velduga maskinaríi hevur ein 26 ára gamal norskur skipari.
