Tær eru ikki favorittar, men veddingarfyritøkurnar siga kortini, at tær kunnu vinna.
Í gjárkvøldið vóru sangirnir, sum í ár kappast í Melodi Grand Prix, kunngjørdir, og nú eru veddingarfyritøkurnar farnar í gongd við at meta um, hvørjir sangir hava best møguleika at vinna.
Eingin ivi er um, at tað eru teir báðir fyrstu sangirnir, sum tey hava best vónir til. Sangurin Starlight hjá Anna Ritsmar og Riot hjá Ditte Marie fáa odds 3,50 og 3,75 til at vinna, siga Danske Spil. Teir ivast tó eitt sindur, tí síðani 2009 hevur ongin sangur við startnummarið undir fýra vunnið donsku finaluna.
Meir áhugavert fyri okkum føroyingar er, at Danske Spil nevnir sang nummar sjey og átta sm møguligar vinnarar eisini. Sangur nummar 7 er Standing Up for Love hjá Carlsen-systrunum, meðan nummar átta er Signals hjá KARUI.
- Carlsen-systrarnar fáa heilt víst nógvar atkvøður úr Føroyum og samstundis er tað ein ordiliga klassiskur Grand Prix-sangur. Tí geva vit teimum odds 7,00 sigur Mathias Reimer Larsen í Danske Spil.
Signals hjá KARUI og Angels to my Battlefield hjá Sandra fær eisini odds 7,00, meðan Music for the Road hjá Albin Fredy fær odds 8,00.
