Kommunusamskipan Føroya
Av tí at nevndarálitið og málsgongdin sum heild er ørkymlandi fyri Kommunusamskipan Føroya, loyva vit okkum hesa stuttu viðmerking, nú uppskotið skal til aðru viðgerð í dag 18. apríl 2007.
Landsstýrismaðurin í almanna- og heilsumálum fekk í juni 2005 handað álit um støðuna hjá teimum heimleysu í Føroyum. KSF tók lut í hesum arbeiði, har tað m.a. varð mælt til, at kommunurnar hava ábyrgdina at veita teimum heimleysu bútilboð.
Landsstýrismaðurin sendi samsvarandi hesum hin 22. september 2006 uppskot til hoyringar um serlig bútilboð til heimleys. Uppskotið fevndi eisini um virkisfremjandi stuðul, umsorgan v.m., og hevði KSF í hoyringsskrivi dagfest 16. oktober 2006 fleiri konstruktivar viðmerkingar til uppskotið.
KSF frættir tó einki aftur frá landsstýrismanninum fyrr enn vit staðfesta, at nýtt uppskot er lagt fyri løgtingið. Nýggja uppskotið fevnir bert um at veita bútilboð, sum landið nú skal hava ábyrgdina av umvegis sjálvbodnar hjálparfelagsskapir.
Í viðmerkingunum verður sagt um tað fyrra uppskotið, at tað fekk so nógvar atfinningar serliga frá kommunufeløgunum, at avgjørt varð at broyta uppskotið soleiðis, at ummælissvarini vóru tikin til eftirtektar.
Til hetta skal KSF viðmerkja, at hoyringsskrivið hjá KSF er á ongan hátt atfinningarsamt um ta yvirskipaðu kommunalu ábyrgdina á økinum, men høvdu vit fleiri viðmerkingar og ivamál um ítøkiligu ásetingarnar í uppskotinum, og tí er grundgevingin fyri broytta ábyrgdarbýtinum ikki røtt.
KSF fekk ongantíð seinna lógaruppskotið, sum landsstýrismaðurin nú hevur lagt fyri tingið, til hoyringar, og tað gjørdi sum skilst heldur eingin annar.
Tað kom tó sera óvart á, at trivnaðarnevndin í áliti sínum til løgtingið ber framundir, at kommunurnar ikki vilja hava ábyrgdina av bústaðarviðurskiftunum hjá teimum heimleysu. KSF er av teirri áskoðan, at uppgávan og ábyrgdin at veita heimleysum hóskandi bútilboð er felagskommunal, og tað harmar tí KSF almikið, at heldur ikki trivnaðarnevndin tók stig til nakra hoyring um uppskotið.
