Í Vikuskiftissosialinum stendur at lesa um fukttrupulleikarnar, sum eru á Boðanesheiminum, í Fimi og í skúlunum á Argjahamri og við Løgmannabreyt , alt í Havn.
Hesir bygningarnir hava kostað Tórshavnar kommunu yvir eina hálva milliard krónur at byggja, men hóast tann elsti teirra varð tikin í brúk so seint sum í 2008, hava allir trupulleikar við fukt og lekum í størri ella minni mun.
Fimi sleppur lættast undan, har er talan um ein ávísan leka, sum tó ikki ger skaða á bygningin. Á Boðanesheiminum og á skúlunum stendur verri til.
Les eisini: Nýggjur skúli á tremur við soppavøkstri
Mikael Viderø, tekniskur stjóri í Tórshavnar kommunu sigur, at kommunan er farin undir at loysa hesar trupulleikarnar.
- Vit eru farin í gongd við málið. Vit hava biðið um sýn av bygningunum, men tað hevur ávísar mannagongdir, sum taka sína tíð. Í einum máli bíða vit eisini eftir tryggingini, men vit eru í gongd, sigur hann.
Les eisini: Lekur um vindeyguni hjá teimum gomlu
Sum dømi nevnir hann, at kommunan í næstum fer undir at skifta gipspláturnar í kømrunum á Boðanesheiminum, sum hava fingið skaða av lekum.
- Hetta verður sjálvsagt tikið í størsta álvara og arbeitt verður við at finna eina loysn. Skaddu pláturnar skulu sjálvandi skiftast, sigur Mikael Viderø.
Á skúlunum báðum er eingin endalig niðurstøða gjørd um, hvat skal gerast.
- Fyrst skal sýn og meting gerast fyri at staðfesta hvørjir skaðar eru og hvat skal gerast fyri gera skaðarnar aftur, sigur hann.
Av tí, at tað ikki er kannað til fulnar og tí ikki er greitt, hvat skal gerast við ymisku trupulleikarnar, veit Mikael Viderø enn ikki at siga, hvussu nógv hetta fer at kosta Tórshavnar kommunu, ei heldur, um tað verður Tórshavnar Kommuna ella arbeiðstakararnir, sum mugu bera kostnaðin.
Les alla samrøðuna við Mikael Viderø um teir fýra bygningarnar í Vikuskiftissosialinum.
