Børn av bygd og børn úr útjaðaranum í 9. flokki skulu í framtíðini sendast á eftirskúla.
Hetta skal gerast fyri at tryggja, at øll fáa møguleika at fáa sær eina útbúgving.
Soleiðis verður lagt upp til í eini frágreiðing um framtíðar skúlaskapin í Grønlandi. Og her verður ikki spart uppá krútið:
Tað eru ov nógv børn og ung, sum í fólkaskúlanum ikki fáa tann neyðuga kunnleikan at kunna byrja eina útbúgving.
Trupult
Tað eru serliga børn frá bygdunum og útjaðaranum, sum merkja hetta:
Undirvísingini í lærugreinunum danskt, enskt og støddfrøði er ikki nóg góð, verður sagt.
– Ja, støðan er alt annað enn góð, verður sagt.
Nú ætlar grønlendska landsstýrið at gera nakað álvarsamt og ítøkiligt við trupulleikan. Og her er nóg mikið at fara í holt við.
Hagtølini vísa, at 70 prosent av teimum, sum fingu prógv frá einum eftirskúla í fjør, eru farin undir eina útbúgving.
Sambært ætlanini “Regional Udviklingsstrategi” skal møguleiki verða fyri at stovna eftirskúlar frá 9. flokki í kommunum kring landið.
Eftir ætlan verður eitt uppskot um hetta langt fyri politiska myndugleikan í heyst.
