Tað er ikki tí, at pengar mangla, at pengar ikki eru til Landssjúkrahúsið og sjúklingaviðgerðir uttanlands.
Tað sigur Jenis av Rana, løgtingsmaður og formaður Miðfloksins í sambandi við tíðindini um, at játtanin til Landssjúrkahúsið og sjúklingaviðgerðir uttanlands er um at vera uppbrúkt.
– Tíðirnar eru so góðar fíggjarliga, at “yvir flýtur”. 158 mió. eru í yvirskoti í ár og væntandi 460 mió. komandi. Og peningur verður settur í búskapargrunn, 23 mió í ár og eftir ætlan 263 mió næsta ár.
– Jamen, er tað ikki óført, spyr tú kanska, at seta av til verri tíðir? Jú, so avgjørt, men tað er ikki í lagi, um peningur væntar til grundleggjandi tørvir hjá borgaranum. Tann peningur, sum verður tikin inn í skatti og avgjøldum frá vanliga borgaranum og vinnuni, skal fyrst av øllum brúkast til dagligu tørvir borgarans og ikki til at verða goymdur, sigur Jenis av Rana.
– So áheitan Miðfloksins til løgman er einføld, leita inn í títt sosiala hjarta og gev boð um at flyta tær neyðugu milliónirnar frá heiløgu kúnni, Búskapargrunninum, til heilsuverkið, sigur løgtingsmaðurin.
– Dagurin má ikki koma, tá Búskapargrunnurin, alt gott annars um hendan, ella aðrar heilagar kýr verða raðfestar framum grundleggjandi tørvir hjá einstaka borgaranum, heldur formaður Miðfloksins.
