Jan Müller
Fyrr í vikuni varð kunngjørt, at oljufelagið OMV hevur keypt seg inn í brunnin, sum ENI borar í næsta mánað. Nú ljóðar fyri vist, at enn eitt útlendskt oljufelag hevur keypt seg inn í henda sjeynda brunnin, sum verður boraður á landgrunninum. Talan er um tað bretska Dana Petroleum, sum eigur 27% av føroyska oljufelagnum Faroe Petroleum, ið eisini er við í boringini. Tað skilst, at Dana keypir ein part av lutinum hjá ENI, sum í løtuni er 55%. Hetta merkir so aftur, at Dana fer at vera við í boringini bæði sum medeigari í Faroe Petroleum og sum sjálvstøðugt felag.
Dana er eitt av teimum rættiliga virknu oljufeløgunum í Bretlandi. Sambært frágreiðingini, sum varð gjørd í sambandi við ársúrslitið fyri 2009, fer felagið í ár at bora ikki færri enn 17 leitibrunnar. Tveir av hesum brunnum eru sertakliga áhugaverdir og ein teirra er Anne Marie brunnurin í Føroyum skrivaði felagið í ársfrágreiðingini. Orsøkin til at felagið kundi skriva hetta var m.a. tann, at felagið tá hevði eina optión (framíhjárætt, red.) frá ENI at vera partur av boringini. Nú hevur felagið so ynskt at vera beinleiðis partur av boringini og er tað Vinnumálaráðið, sum skal geva tað loyvi eftir tilmæli frá Jarðfeingi.
Johan Dahl, oljumálaráðharri sigur, at tað er rætt, at enn eitt útlendskt oljufelag hevur søkt um loyvi at vera partur av leitingini á landgrunninum. Meira vil hann ikki siga í løtuni. Sosialurin skilur, at Jarðfeingi hevur viðgjørt umsóknina og skal hon nú endaliga góðkennast av Vinnumálaráðnum. Upprunaliga hevði Dana eina optiónsavtalu við ENI. Nú hevur felagið kortini avgjørt at keypa seg inn í loyvi 005. Harvið verða ikki færri enn fimm feløg við í hesum nýggjasta brunninum á landgrunninum. At so mong oljufeløg vilja vera við er eitt gott tekin til føroyskar oljumyndugleikar. Men tað merkir so eisini, at ynki er um at býta váðan.
-------
Dana Petroleum Faroe Branch
Mikudagin kunngjørdi Skráseting Føroya, at Dana Petroleum (E&P) Faroe Branch, filialur av Dana Petroleum (E&P) Lrd., (UK) er skrásett í Føroyum. Filialleiðari er Anna Hovgaard Dam og er adressan hjá felagnum Yviri við Strond 4 í Havn. Kapitalur er GBP 7.154.067,00. Endamálið hjá felagnum er at reka virksemi við leiting eftir, framleiðslu av og sølu av kolvetnisgrundaðum tilfeingi, í einum og hvørjum parti av verðini, og annað virksemi samsvarandi endamáli felagssins.
