- Flestu partrolarapør eru til fiskiskap. Tey flestu fiska upsa, og okkurt parið fiskar svartkalva. Fiskiskapurin eftir upsa er brúkiligur.
Tað vita tey á Fiskamarknaði Føroya at siga. Lagt verður aftrat, at partrolarapørini koma inn at landa, sum næsta vika gongur.
- Ein djúpvatnstrolari fiskar svartkalva og frystir veiðina umborð. Tríggir fiska mest upsa og fáa nakað av toski og longu sum hjáveiði. Møguliga landa allir tríggir ísfiskatrolararnir í næstu viku.
Í dag, tá tey á Fiskamarknaði Føroya gjørdu sínar metingar fyri næstu viku, vóru tríggir trolbátar til fiskiskap, tveir á landleiðini og ein á Íslandsrygginum.
- Trolbáturin, sum fiskar á Íslandsrygginum, kemur væntandi inn at landa mánadagin og teir, sum fiska á landleiðini, koma helst síðst í næstu viku.
Lagt verður aftrat, at trolbátarnir fáa eina blanding av toski, reyðsprøku, tungu, havtasku og so nakað av hýsu.
