Borgarstjórin í Nes kommunu, Jóhannus Danielsen, er sera harmur um, at landingarmiðstøðin á Toftum er latin aftur.
- Landingarmiðstøð hevur verið virkin á Toftum heilt síðan 1993. Við afturlatingini missir Nes kommuna bæði arbeiðspláss og vørugjald í samband við landing.
Jóhannus Danielsen vísir á, at afturlatingin ikki minst er keðilig fyri útróðrarmenn, nú eingin verður at taka ímóti fiski á Toftum og á Skálafjørðinum sum heild.
- Hetta er eisini ógvuliga keðiligt fyri tey línuskip, sum eru heimahoyrandi á Toftum og fyri onnur skip, sum plagdu at landa fast á Toftum.
Borgarstjórin sigur seg vóna, at onkur fer at síggja møguleikar í landingar-og fiskavirksemi í síni heild á Toftum.
- Havnaviðurskiftini eru góð, eins og bygningar eru á havnalagnum, sum eru vælegnaðir til slíkt virksemi.
Jóhannus Danielsen sigur seg vóna, at har ein hurð letur aftur, letur ein onnur upp, soleiðis at slíkt virksemi aftur verður á Toftum.
- Her eru í hvussu er allar fyritreytir fyri slíkum virksemi, leggur borgarstjórin dent á.
