Fólkið valdi blokktiðnan, fólkið valdið at vraka ta avtalu, sum allir flokkar á tingi hava virt síðstu átta árini um, at blokkurin skal standa í stað. Nú hevur fólkið valt, at Kaj Leo Johannesen saman við Fólkaflokki, Miðflokki, Sjálvstýri og Framsókn við hattinum í hondini fer niður at spyrja Helle Thorning-Schmidt og Bjarne Corydon, um vit ikki kunnu fáa tær 130-200 milliónirnar aftur – sum vit ikki hava viljað havt síðstu átta árini.
Fólkið valdi fullveldi og Tjóðveldi frá. Og fólkið gav eisini Javnaðarflokkinum afturgongd. Við greiðari tilsiping til Kristin Michelsen, borgarstjóra á Tvøroyri og nýggja tingmann Javnaðarfloksins, segði løgmaður í Degi og Viku í gjárkvøldið, at hann ikki stólar upp á nýggju tingmanningina hjá Javnaðarflokkinum, sum hann millum annað tí ikki vil samstarva við.
Fólkið hevur eisini valt, at vit skulu hava eina flatskattaskipan. Eina skipan, har eingin rindar meira enn 40 prosent í skatti. Og somuleiðis hevur fólkið valt, at vit ongan fiskivinnureform skulu hava. Vit skulu heldur ikki hava nakran kommunureform. Trupulleikin við at leggja kommunur saman, hann lata vit kommunurnar greiða sjálvar – sjálvbodnar, og so stríðast vit víðari.
Tilfeingisgjaldið hava vit eisini valt frá, eins og lívfrøðiliga grundaðar stovnsmetingar og harav ásett veiðitrýst.
Løgmaður hevur svorið, at Sambandsflokkurin stendur sum ein maður í fiskivinnumálum, sum vóru við at klíva flokkin fyri fáum vikum síðani. Tað man so vera fiskivinnupolitikkurin hjá Fólkaflokkinum og meirilutanum í tingmanning floksins, sum løgmaður nú hevur tikið at sær, og hesum kann allur tann borgarlig vongurin nú taka undir við – uttan vælsaktans Framsókn.
Men løgmaður hevur eisini víst á, at alt snýr seg um búskap. Og svarið er at fáa danska landskassan at gjalda – eitt mál sum ikki kann vera annað enn bluff ella ófatiliga stór og naiv undirbrotligheit. Ikki tí, alt ber til í politikki, men um hetta kiksar, so fer tað helst eisini at perla av løgmanni, sum var hann sveiptur í teflon.
Pengar skulu so í kassan. Sambært løgmanni, so skal javnvág helst verða á fíggjarlógini longu um tvey ár, og tí verður sera spennandi at frætta, hvussu borgarliga alternativið ætlar, at so nógv meira skal í kassan enn úr kassanum.
