Fótbóltur
Jákup Mørk
jakup@sosialurin.fo
Kaunas, Litava: Meðan liðfelagarnir stríddu seg til eitt stig í dystinum móti Eysturríki, var Símun Samuelsen eftir á Hotel Føroyum.
Bruni gjørdi um seg í hálsinum, og tí var ikki hugsingur hjá Símuni um at vera partur av hópinum, men hann ásannaði mánadagin, at hann var ovurfegin um úrslitið.
- Hatta var fantastiska stuttligt at hyggja eftir, men samstundis var tað óhugnaliga spennandi. Eg lág jú einsamallur á Hotel Føroyum, og eg haldi, at seinastu 10 minuttirnar lág eg bara undir dýnuni.
Mánadagin var Símun tó við í landsliðsferðalagnum, og hann sigur seg vilja stríðast fyri at endurvinna plássið.
- Eg mundi taka eini tvær penicilin-tablettir eyka, tá hatta úrslitið kom heim. Nú gongur í øllum førum betur, og so má eg bara stríðast fyri mínum plássi. Hatta úrslitið staðfestir í øllum førum, at eingin kemur inn á liðið uttan víðari, og soleiðis skal tað eisini vera, sigur Símun Samuelsen.
