Heystið er komið, og fjøllini stunda til. Longu nú hava menn flett onkrar veðrar, ær og lomb, og í næstum verða skurðfjøllini gingin.
Í summar, tá roytingin var fyri, varð nógv gjørt burtur úr, at trupult fór at vera at sleppa av við ullina. Soleiðis verður tó ikki við skinnunum.
Á Sandi hevur Bjarki Henriksen í kvøld longu saltað tey fyrstu skinnini. Hetta eru veðra-og ærsskinn.
Hann tekur ímóti og saltar fyri Sp/f Oikos, sum hevur heimstað í Bø. Tað gjørdi hann eisini í fjør heyst, tá hann saltaði stívliga 1400 skinn.
- Peningur verður bert latin fyri lambsskinnini, men vit taka eisini ímóti og salta veðra-og ærsskinn, sigur hann.
Bjarki Henriksen vísir á, at djóralæknaeftirlit er við seyðinum, haðani skinnini eru, sum hann keypir og saltar fyri Sp/f Oikos.
Hvørt lambsskinn fær umleið trý pottamál við ídnaðarsalti, og veðra-og ærsskinnini fáa umleið fýra pottamál.
- Eins og í fjør er adressan fyri móttøku av skinnum Eystanvegur 19 á Sandi, leggur hann aftrat.
