Eyðstein Poulsen
Havi følt størri og størri ótryggleika, síðan sitandi samgonga kom til valdið. Vit kunnu ikki annað enn staðfesta, at tær akademisku kreftirnar hava fingið takið á okkara landsstýrismanni í fiskivinnumálum. Hetta er nakað, sum undanfarnir landsstýrismenn í sama ráði hava megnað at staðið ímóti.
Rákið, sum hevur ligið í luftini tey nógvu seinastu árini, er nú farið at blóma, tí vit hava fingið ein móttakiligan fiskimálaráðharra.
Hevði fiskivinnan havt onkran góðan suðuri í Havn, høvdu vit havt eina natúrliga
frá- og tilgongd í tí føroyska fiskiflotanum. Óvissan, sum er komin í, síðan Bjørn Kalsø kom til valdið, hevur skapt eitt trýst á fólk um at handla í óðum. Hetta, fyri at sleppa sum frægast burtur úr hesu ómenniskjansligu viðferð, sum Bjørn óvitandi tekur undir við, sjálvt um hann heldur at hann ger væl, sum hann so róliga sigur ferð eftir ferð í fjølmiðlunum.
Míni ráð til sitandi landsstýrismann eru, leita aftur til tínar røtur og far djúpari í spurningarnar, sum taka seg upp. Gloym ongantíð, at tey sjónarmið, sum tú so ríkiliga verður fóðraður við í tinum sitandi starvi, sjálvdan koma frá monnum, sum tóku takið, tá ið tað skuldi takast. Lít á míni orð, teir koma heldur ikki at taka takið við okkum aftur, tá ið brúk verður fyri tí.
Hetta ljóðar kanska sum enn ein bittur reiðari, sum vil hava pengar, men so er ikki. Tað einasta, sum hesin reiðarin vil, er at venda tí óhølvaða tosinum, sum leingi hevur verið frammi, um at vit fáa nakað ókeypis. Hetta er rein propaganda. Vit, eins og aðrir, hava keypt øll okkara rættindi, og samstundis sum vit hava goldið fyri hesi, eru vit við til at hækka um inntøkuna fyri føroya land ár um ár. Mær vitandi er tað hesin peningur, sum vit øll liva av.
Hví skulu vit lata okkum linda at hoyra og síggja í fjølmiðlunum, at vit eru reinir bandittar fyri føroya land. Hesi orð koma mest frá fólki, sum ikki eftir mínum tykki, men eftir veruligum tølum (sum eg ikki fái ávirkað) meir ella minni eru ein útreiðsla fyri føroya land.
Gott fiskiár øll somul
