Føroyskir rennarar stóðu seg framúr væl í Skive leygardagin og sunnudagin, har kappast var um donsku meistaraheitini í innandura renning. Úrtøkan gjørdist tvey gull-, tvey silvur- og tvey bronsumerki, umframt eitt føroyskt met.
Bjørk Herup Olsen, sum kappaðist í bólkinum gentur 18-19 ár, vann sunnudagin gull á 1.500 metra teininum og gjørdist danskur meistari við tíðini 4.28,27 minuttir, sum var 15 sekund betri enn tíðin hjá tí næstbesta. Og leygardagin vann hon silvur í 3.000 metra renning, tá hon samstundis megnaði at seta nýtt føroyskt met við tíðini 10.16,93 minuttir.
Eisini Rúni Seloy gjørdist danskur meistari, tá hann leygardagin í bólkinum dreingir 14-15 ár rann 800 metrar við tíðini 2.06,68 minuttir. Og sunnudagin, tá hann rann 1.500 metrar við tíðini 4.22,57 minuttir, rakk tað til eitt bronsumerki.
Rebekka Fuglø vann silvur leygardagin, tá hon í bólkinum gentur 16-17 ár rann 800 metrar við tíðini 2.24,48 minuttir, og sunnudagin vann Jóan Karl Joensen bronsu á 1.500 metra teininum hjá monnum 20-22 ár við tíðini 4.15,85 minuttir.
