Birgit Guttesen, sum áður hevur leikt við SÍ, men síðani er flutt til Klaksvíkar og nú spælir við Mjølni, var sum vera man sera fegin um steypasigurin.
- Hetta kundi ikki verið betri, staðfestir hon stutt, áðrenn vit tosa um hvat riggaði væl hjá teimum.
- Eg vil siga, at alt riggaði. Móttøkurnar, álopið og so eisini servurnar, sum vóru betri enn í fjør. Tær vóru betri enn teirra, og so spældu vit eisini sum eitt lið, sigur Birgit.
Hetta er annað árið á rað, at Mjølnir vinnur steypakappingina, somuleiðis sum hetta er triðju ferð í verandi kappingarári, at tær vinna á SÍ.
- Vit eru sjálvtryggar. Vit eru komnar í eina stima, har vit eru vanar at vinna, og tað haldi, at vit duga væl. Vit duga at vinna, og tað er eitt kynstur, sigur Birgit Guttesen, sum er í holt við sítt triðja kappingarár í Mjølni.
