-Eg elski fólkið í Føroyum. Tey eru eldhugaðið um styrki. Eg haldi tað kemur frá tykkara mentan við hørðum arbeiði. Norðbúgvar eru eitt serligt fólkaslag, sum er hugað at stríðast fyri sínum málum, og tað prógvar Bjarni Nielsen, ið er á markinum til at vera í heimsflokki.
Hesi orðini eigur Bill Kazmaier, ið var dómari til sterkmannakappingina, Burn Showdown, ið var um vikuskiftið.
Bill Kazmaier er ikki einhvør dómari. Trý ár á rað, í 1980, 81 og 82, var amerikumaðurin kosin at vera heimsins sterkasti maður. Eitt avrik, ið hevur gjørt hann til eina ímynd av styrki um allan heim.
Tá ið In.fo hittir hann, er hann júst liðugur at taka myndir og skriva autografar til ungar føroyskar fjepparar, ið kenna navnið Bill Kazmaier úr søguni.
-Hetta er eitt Framúr tiltak, Jákup Suni Berg hevur gjørt eitt stórt avrik at fáa hetta tiltakið til veruleika, ið umboðar tað arbeiði fólk leggja í at fáa fólk í kropsliga venjing. Hetta er eitt vælsignilsi fyri tykkara samfelag, heldur Bill Kazmaier fyri. Hetta hjálpir fólkum at liva sunnari, glaðari og longri lív, greiðir hann frá.
Sterki maðurin er í Føroyum fyri aðru ferð, og tað er bæði av áhuga og fyri at varpa ljós á styrkiskappingar í Føroyum.
-Eg eri partur av at lýsa hetta tiltakið fyri umheiminum, og tað er ikki ógjørligt at hendan kappingin verður sjónvarpað um allan heimin um nøkur ár. Burn Showdown hevur avgjørt møguleika fyri at gerast ein av fremstu kappingunum innan styrki, um menningin heldur fram.
Bill Kazmaier vísir at enda á hvat krevst hjá monnum sum eitt nú Bjarna Nielsen at røkka upp á tað støðið, ið gjørdi amerikumannin til heimsins sterkasta mann tríggjar ferðir.
-Eg dugdi bert tvey orð:Eg kann og eg vil. Hetta endurtók eg fyri mær sjálvum, og við Harrans hjálp eydnaðist tað at vinna.
Hóast Bjarni Nielsen hevur góðar møguleikar, so slær trífaldi heimsmeistarin fast at har er bert ein Bill Kazmaier, og hann kemur ikki aftur.
