Betrið Banki brúkti 10 milliónir krónur upp á stjóralønir í fjør.
Tað vísir topp 10 listi, sum er gjørdur burtur úr teimum 531 roknskapunum hjá føroyskum partafelgum, sum higartil er komnir í teldugrunnin hjá vinnuvitan.biz fyri roknskaparárið 2017.
Í roknskapunum sæst ikki altíð, hvussu nógvir persónar kunnu hava fingið stjóraløn frá einum partafelag, men tað hevur verið alment frammi, at stjóraskiftið í Betri Banka hevur kostað felagnum nógvar pengar. Tá Suni Schwartz Jacobsen fór frá sum stóri í Betri Banka fekk hann 6,1 millión krónur í fráfaringarløn. Tað er kortini ikki øll uppsagnarlønin hjá Suna Schwartz Jacobsen, sum var stjóri í fleiri feløgum hjá Betri samtakinum. Í roknskapinum fyri samtakið Betri stendur uppsagnarløn til Suna Schwartz Jacobsen at fera 8,96 milliónir krónur.
Bjørn Mortensen, sum tók við sum fyribils stjóri í Betri Banka nakrar mánaðir í fjør fekk 1,73 milliónir krónur fyri ta uppgávuna.
Á topp 10 listanum hjá vinnuvitan.biz sæst eisini, at tvey av feløgunum hjá landsstýrinum liggja á 5. og 6. plássið, tá tað snýr seg um hægstu stjóralønirnar: Atlantsflog rindar 2,6 milliónir krónur í stjóralønum í 2017 og Vága Floghavn 2,4 milliónir krónur. Atlantsflog hevur tveir stjórar, og Vága Floghavn hevði stjóraskifti í fjør.
Freistin at lata ársroknskapir inn fyri 2017 er ikki farin enn. Tí kann hesin topplistin broytast. Higartil eru lætnir inn 531 roknsskapir. Í fjør vóru teir 2.635 í tali.
Topp 10 listin yvir feløg við hæstu stjóralønum sær soleiðis út:
1 | Betri Banki P/f | 9.999 |
2 | Bakkafrost P/f | 5.207 |
3 | Betri P/f | 4.590 |
4 | BankNordik P/f | 2.677 |
5 | Atlantic Airways, Faroe Islands P/f | 2.586 |
6 | Vága Floghavn P/f | 2.424 |
7 | Norðoya Sparikassi Spk | 2.142 |
8 | Atlantic Petroleum P/f | 1.818 |
9 | Betri Trygging P/f | 1.598 |
10 | Suðuroyar Sparikassi P/f | 1.286 |
