Sum ein liður útbyggingini av Heimarøktini fer økisterapi og náttarvakt nú at virka í Suðuroynni. Við hesum tænastum verður Suðuroyggin nú væl útbygd við heimarøktartænastum. Tað er Heimarøktin og Serforsorgin sera fegin um at kunna bjóða brúkarunum í Suðuroynni, sum er eitt av teimum økjunum í landinum, sum ikki hevur verið so væl fyri viðvíkjandi tænastum.
Økisterapiin er ein tænasta, har borgarin fær hjálp til at halda sín kropsliga førleika viðlíka og hjálp til at gera tað lættari at klára seg sum longst við sínum førleikum í egnum heimi.
Økisterpiin í Suðuroy byrjar 1. februar 2006. Økisterapiin virkar frammanundan í Suðurstreymoy og Sandoynni.
Skipanin við náttarvakt verður fyri fyrst ein royndarskipan, har Heimarøktin í Suðuroy fer at skipa eina koyriskipan við koyrandi náttarvakt fyri alla oynna.
Royndarskipanin, kemur væntandi í gongd 1. mai 2006. Tá árið er av, verður skipanin eftirmett, og støða verður tá tikin til, um hon skal halda áfram. Royndirnar í Suðuroy skulu eisini verða grundarlag fyri eini avgerð um, hvussu skal farast víðari við at bjóða somu tænastu í øðrum økjum í landinum.
Frammanundan er náttarvaktsskipan í Heimarøktini í Eysturoynni. Skipanin í Eysturoynni hevur virkað í gott tvey ár og er skipað við tilkallivakt.
Tá skipanin verður sett í verk, kunnu brúkararnir fáa samband við Heimarøktina alt samdøgrið, og við bráðfeingistørv fer náttarvaktin á heimavitjan. Hetta fer at geva brúkararunum eina størri trygd, serliga teimum sum búgva einsamøll.
