Tað var við beráddum huga, at Skemt 2010 gjørdist jólatrøll. Ístaðin fyri at gerast tann stuttligasta jólagávan í ár, verður hon nú til ta bestu og og mest hugvekjandi nýggjársgávuna í januar 2011. Um somu tíð sum hon verður eitt søguligt yvirlit yvir hendingar í farna árinum, fer hon eisini at taka samanum øll tey mongu árini Óli Petersen hevur teknað baksíðuna á Sosialinum.
Listamaðurin og skemtiteknarin Óli Petersen verður 75 ár 24. januar, og tað er í hesum sambandi, at útgevarin hevur gjørt av at geva Skemt 2010 og havið ta 22. í røðini av Skemtbókum út til sjálvan føðingardagin.
Bókin verður tí eisini ein jubileumsbók, har listamaðurin verður heiðraður við einum serstøkum íkoyti til bókina.
Nú so nógvar bøkur koma út til jóla, man tað eisini vera kærkomið fyri øll heim í Føroyum at fáa eina spildurnýggja og feska bók í januar eisini, møguliga og helst tann fyrsta føroyska bókin í nýggja árinum. Harvið er hon eisini ein forkunnug føðingardagsgáva til samfelagið Føroyar, nú tá hol verður sett á eitt spildurnýtt ártíggju við vónandi mongun forvitnisligum og stuttligum nýggjum tekningum frá listamanninum á Skála.
Hátíðarhald verður í Miðlahúsinum í sambandi við 75 ára dagin og 22. Jubileumsútgávuna, tá høvundin eisini fer at signera bókina.
Hjá teimum í landinum, sum ikki hava ognað sær Skemtbøkurnar, ber til á føðingardagshaldinum í Miðlahúsinum at ogna sær tær bøkur, sum framvegis eru á goymslu umframt túsundtals originaltekningar, sum ganga heilt aftur til 1989.
Til ber eisini longu nú at bíleggja sær Skemt 2010 við at senda ein teldupost til:
jan@sosialurin.fo
