Skjótt er eitt ár síðani, at Flemming Bamse Jørgensen doyði. Men fløgurnar hjá honum verða framvegis seldar.
Savnið av fløgum, ið eitur De store og de glemte, hevur verið tøk í Danmark í tríggjar vikur. Og ikki minni enn 10.000. eintøk av fløgunum eru seldar. Hetta gevur samlingini eitt triðja pláss yvir mest seldu fløgum í løtuni.
Amy Winehouse, sum eisini doyði fyri nøkrum mánaðum síðani, er á einum 31. plássi, við savninum Lioness: Hidden Treasures.
Tó hevur savnið einans verið tøkt í tríggjar dagar.
Ein onnur deyð tónleikastjørna, Michael Jackson, fær ikki selt sítt tónleikasavn serliga væl. Tað eru næstan bara teir mest trúgvu áhoyrararnir hjá avdeyðu popp-legenduni, ið orka at keypa tað, sum liggur eftir hjá honum. Tað seinasta savnið, Immortal, bleiv nevnliga bara keypt 162 ferðir í farnu viku. Hetta merkir, at Immortal við neyð og deyð kemur á topp-100 listan.
Rasmus Seebach er á 1. plássi við fløguni Mer end kærlighed. 91.500. eintøk eru blivin seld upp á 7 vikur.
Skrivað hevur: Neli Heldarskarð
