Bakkafrost veksur um flotan og nu hevur alifelagið aftur keypt eitt veitingarskip úr Noregi. Tað er eitt lið í íløguætlanini fyri virksemið í Skotlandi, at Bakkafrost hevur keypt eitt nýtt tænastuskip.
Í hesum sambandi hevur Bakkafrost skrivað undir sáttmála við norska felagið, Eidesvik Shipping, um at keypa Viking Athene, sum hevur verið veitingarskip í norsku frálandavinnuni. Viking Athene er systurskip til tænastuskipið M/S Martin, sum Bakkafrost keypti í 2016.
– Ætlanin er at byggja skipið um til tænastuskip í alingini, eins og gjørt varð við Martin og Róland, sigur Bakkafrost í eini fráboðan.
Ein nýggj avlúsingarskipan, og útgerð í samband við tilbúgving, verður sett í skipið. Nú skipið verður yvirtikið og skrásett, skulu ymiskar umbyggingar og tillagingar gerast til okkara tørv. Skipið væntast at verða klárt til at fara í vinnu um Ólavsøkumundið, sigur Sverri Kjærbæk, rakstrarleiðari hjá Bakkafrost.
Nýggja tænastuskipið er 73,4 metrar langt og 16,6 metur breitt og fær navnið Bakkanes. Skipið kemur at arbeiða á aliøkjunum á vestursíðuni av Skotlandi, sigur Sverri Kjærbæk.
