Stigatalvan segði, at teir næstbestu hjá Víkingi í kvøld vóru favorittar á heimavølli, tá ið teir høvdu vitjan av B71.
Men tað vóru sandoyingar, sum vunnu øll stigini. Tá ið dómarin bríkslaði fyri síðstu ferð, var úrslitið 4-2 til B71. Hetta er fjórða ferðin á rað, at B71 fer ósigrað av vøllinum. Undanfarnu tríggjar ferðirnar er tað endað 1-1 á heimavølli ímóti EB/Streymi og HB og við 6-0 heimasigri ímóti B68.
Hálvleiksstøðan í Sarpugerði var 3-1 til B71. Øll málini í fyrra hálvleiki vórðu skorað innanfyri 10 minuttir miðskeiðis í fyrra hálvleiki. Tijani Mohammed legði gestirnar á odda bæði 1-0 og 2-0. Nú hevur hann í átta dystum í landskappingini skorað sjey mál, og hetta var triði landskappingardysturin á rað, at hann var málskjútti.
Fimm minuttir eftir, at B71 hevði lagt seg framum 2-0, svaraði Víkingur aftur. Talan var um sjálvmál, sum B71 verjuspælarin Alvi Jespersen var skrásettur fyri, og so var tað, at hesin sami Alvi Jespersen skoraði í hinum endanum og økti um munin til 3-1.
Tað kom av álvara spenningur í, tá ið Óla Kristian Skála Jacobsen smáar 20 minuttir undan leikloki minkaði um munin til 3-2. Hann hevur nú skorað fýra mál í ár. Og so var tað, at Kristian Krog Hentze í síðsta minutti staðfesti B71 sigurin. Hetta var fyrsta málið hjá honum í ár.
Víkingur hevur 15 stig, og B71 hevur 11 stig. Bæði liðini hava spælt átta dystir.
