Ein av teimum, sum átti heilt stóran leiklut, tá ið B68 eftir summarsteðgin skavaði so mikið nógv stig saman, at tað so at siga leyp av í kappingini um at sleppa undan niðurflyting, var málverjin Rói Mørk Hentze.
22 ára gamli Rói Mørk Hentze var fyrstu ferð á B68 liðnum í ólavsøkuumfarinum, tá ið toftamenn vunnu 1-0 í Fuglafirði, og hann var 11 ferðir á liðnum, sum hetta tíðarskeiðið vann 16 stig.
Eingin ivi er um, at tað var ikki minst Róa Mørk Hentze í málinum fyri at takka, at ein so stórur partur av stigunum varð vunnin hesi 11 umførini. Rói var stinnur á strikuni, og hann var góður í brotsteiginum, umframt at hann samskifti væl við verjuna og var við til at fáa tryggleika í verjupartinum.
Í kvøld skrivar B68, at felagið hevur skrivað undir nýggjan sáttmála við Róa Mørk Hentze, sum harvið verður B68 málverji bæði í 2022 og 2023.
Rói Mørk Hentze er uppvaksin í B36, og sambært faroesoccer.com hevur hann spælt 44 dystir í bestu deildini og sjey dystir í kappingini um løgmanssteypið. Hann hevur fýra ferðir vart málið á U-21 landsliðnum.
