Tað lagaði seg væl fyri B36 í dag. Teir í árstalsfelagnum eru á veg av Svangaskarði og stutta teinin umvegis tunnilin og aftur í Gundadal við trimum stigum.
Úrslitið var 3-1 til B36. Harvið hevur B36 20 stig ella eitt færri enn NSÍ, sum er á fjórða plássi og hevur spælt 13 dystir, meðan B36 hevur spælt 12 dystir.
Hóast B68 í fyrra hálvleiki hevði lotið ímóti, so var tað heimaliðið, sum setti hol á. Esmar Clementsen og Steffan A. Løkin, ið er komin fyri seg aftur, eftir at hann var skaddur í U-21 sigrinum ímóti Armenia, vóru vandamiklir í skjótum atsóknum, og teir vóru meistarar fyri 1-0 málinum miðskeiðis í fyrra hálvleiki. Esmer Clementsen legði flatt innfyri úr vinstru, og Steffan var leysur við handara stólpa, tá ið hann stýrdi bóltin upp í nettakið.
Síðsta korterið av fyrra hálvleiki skoraði B36 trý mál, og so var brekkan øgiliga brøtt hjá B68.
Bjarki C. Nielsen javnaði til 1-1, og hann legði B36 framum 2-1. Í fyrra førinum sendi hann bóltin eitt sindur úr vinstru og í handara síðunetið, og í seinna førinum stútaði hann bóltin í málið eftir sending frá Hugin Samuelsen.
Týdningarmikla 3-1 málið skoraði Tobias Christensen, tá ið tað var farið tríggjar minuttir út um vanligu leiktíðina í fyrra hálvleiki. Hann sneiddi seg leysan av fleiri mótstøðumonnunum, og so setti hann bóltin í málið.
Eisini í seinna hálvleiki var tað sera lívligt. Tað vóru spentar støður í báðum endum. B68 hevði fleiri møguleikar, men tað eydnaðist ikki at minka um munin og harvið at kveikja spenningin aftur. Næst við vóru toftamenn, tá ið B36 miðverjin Lukas Enevoldsen bjargaði á málstrikuni.
B68 – B36 1-3 (1-3)
1-0: Steffan A. Løkin 24.
1-1: Bjarki C. Nielsesn 30.
1-2: Bjarki C. Nielsen 40.
1-3: Tobias Christensen 45.
Dómari: Rúni Olsen
B68: Joakim Jurs – Hjalti Strømsten, Aleksandur Ó. Jensen, Chris Jastrzembski, Helgi Johannesen –Tonni J. Thomsen, Áki Johannesen – Andri Benjaminsen, Lukasx Cieslewicz, Esmar Clementsen – Steffan A. Løkin
B36: Mattias Lamhauge – Ragnar Samuelsen, Lukas S. Enevoldsen, Andrias H. Eriksen, Alex Mellemgaard – Mathias Thrane, Hugin Samuelsen – Martin Agnarsson, Tonias Christensen, Bjarki C. Nielsen – Hannes Agnarsson
