Súkkling
At skipa fyri býarkoyring í Havnar Býi er kanska ikki tað lættasta, tí hetta krevur eisini, at ferðslan verður avbyrgd á økinum, har súkklað verður.
Tað fekk í fjør súkkluítróttina at leita til Velbastaðar, tá súkklulandsliðið til Oyggjleikirnar skuldi veljast. Og tað verður á sama teini, at FM-kappingin í ár verður súkklað. Startur og mál er við Eggverikið á velbastað, og saman lagt er rutan á leið tríggjar kilometrar. Og so verður koyrt eftir hesum teinum í trý korter, áðrenn seiansta umfarið ger av, hvør vinnur kappingina.
Kappingin leygardagin byrjar longu klokkan 8 um morgunin, og er freistin at boða frá luttøku fríggjakvøldið klokkan 20.
Fjallasúkkling í Hoydølum
Meðan býarkoyringin er á Velbastað, verður leitað nærri høvuðsstaðnum, tá fjallasúkklingin er á skránni.
Eins og í fjør verður koyrt á einum teini við Studentarskúlan í Hoydølin, og aftur hesa ferð verður koyrt sum MTB Criterium. Tað vil siga, at reglurnar eru tær somu, sum tær eru til býarkoyringina, tó at tíðin hesa ferð er sett til hálvan tíma pluss eitt umfar.
Børn sleppa eisini at royna seg sunnudagin, og meðan tey vaksnu og unglingar byrja klokkan 13, byrja kappingarnar millum børnini klokkan 14.
Børnini kappast í trimum bólkum, og kappast verður millum gentur og dreingir.
