Eftir øllum at døma er avtalað spæl ein stórur trupulleiki kring allan heimin. Ein gøla innan tennisheimin kom undan kavi í gjár, tá ið BBC avdúkaði, at tað sambært skjølum, teir hava fingið fatur á, er nógv avtalað spæl innan tennis.
Sambært BBC er størsti ólógligi peningastreymurin í Russlandi og í Italia, men helst er trupulleikin meiri útbreiddur enn so, tí sambært tíðindum, sum eru komin fram í dag, so rakar avtalað spæl eisini Danmark og Svøríki.
Kenneth Carlsen, sum er fyrrverandi tennisspælari á hægsta stigi, sigur við DR, at danskar kappingar eisini hava verið merktar av í øllum førum tilboðum um avtalað spæl. Hann veit um sokallaðar future-kappingar, har allir luttakararnir hava fingið tilboð.
Eisini svenska Sofia Arvidsson hevur givið viðmerkingar til gøluna, sum BBC hevur avdúkað. Hon greiðir frá, at hon einaferð fekk bjóðað 300.000 dollarar - t.e. 2,05 milliónir krónur - um hon tilætlað lat seg tapa ein dyst.
