Ingolf S. Olsen
Samstarvsavtalan, sum 31. mars varð gjørd millum Landssjúkrahúsið og Fróðskaparsetur Føroya, staðfestir og formaliserar í stóran mun bara tað samstarvið, sum leingi hevur verið, serliga innan útbúgving av sjúkrarøktarfrøðingum. men avtalan byggir eisini brýr millum stovnarnar og gevur avbjóðingar til báðar partar. Og úrslitið skal helst verða, at báðir stovnarnir verða lyftir upp í dygd.
Tað sigur Sigurð Ó. Vang, stjóri á Landssjúkrahúsinum, sum eisini væntar, at avtalan fer at kunna vaksa um áhugan hjá læknum at søkja sær starv á Landssjúkrahúsinum.
- Endamálið er jú at menna bæði ta heilsuvísundaligu granskingina og útbúgvingarnar innan heilsuøkið. Serliga tað yngra ættarliðið av læknum spyr eftir granskingarmøguleikum, so kunnu vit kalla okkum eitt undirvísingarsjúkrahús og bjóða tað, so verður tað helst eisini lættari at draga læknar til okkum.
- Samstarv av hesum slagnum betrar eisini dygdina í okkara viðgerðum. Eg vil lýsa tað soleiðis, at um vit ikki bæði undirvísa, menna og granska, so verða vit við tíðini verri fyri at viðgera okkara sjúklingar, sigur Sigurð Ó. Vang.
Sjúkrakassa-stuðul
Tað er frammanundan næstan vist, at tað eisini verða pengar til hetta nýggja samstarvið úr Sjúkrakassagrunninum, hvørs fæ Granskingarráðið júst hevur fingið at umsita. Tí samstarvið er beinleiðis nevnt í høvuðsøki 3 í ásetingunum fyri, hvussu fæið skal brúkast.
Ítøkiliga er ætlanin, at Landssjúkrahúsið og Fróðskaparsetrið saman seta felags vísindalig starvsfólk, til dømis kliniskan lektara.
- Soleiðis kunnu vit byggja brýr millum tað ítøkiliga arbeiðið og praktisku royndirnar í gerandisdegnum á Landssjúkrahúsinum og tað meira akademiska lærustovnsumhvørvið á Setrinum, har fylgt verður við tí nýggja, sum rørir seg, sigur sjúkrahússtjórin.
Á Fróðskaparsetrinum er ambisjónin einaferð at kunna bjóða lesandi eina læknavísundaliga grundútbúgving, og í tí sambandinum skal ein arbeiðsbólkur sambært nýggju avtaluni setast at lýsa, hvussu ein slík útbúgving kann skipast.
Framsøkin ætlan
Sjúkrahússtjórin heldur, at talan er um eina spennandi og framsøkna hugsan.
- Eg havi spurt meg fyri hjá læknum á sjúkrahúsinum, og er respekt fyri ætlanini. Teir síggja í øllum førum onki skeivt í, at fortreytirnar fyri einari slíkari útbúgving verða lýstar.
- Vit gjalda frammanundan rættiliga fitt av peningi gjøgnum ÚSUN-lestrarstuðulsskipanina til føroysk læknalesandi uttanfyri Norðurlond, eitt nú í Póllandi, har einir 30 føroyingar lesa til lækna. Tað er helst ikki óhugsandi, at fleiri av hesum høvdu valt at byrja útbúgvingina her heima, um møguleiki var fyri tí, sigur Sigurð Ó. Vang.
Stuðulin úr Sjúkrakassagrunninum er avmarkaður til nøkur ár og verður ikki varandi, so nýggja samstarvsavtalan og tey ítøkiligu samstørvini, ið spretta úr henni skulu hava fígging.
Málið er at gerast alsamt betri at søkja uttanhýsis fígging. Innan verandi rakstrarkarmar verður trupult sum støðan er. Eg kann við vissu siga, at onki verður tikið frá sjúklingadeildunum orsakað av samstarvinum við Fróðskaparsetrið, sigur Sigurd Ó. Vang.
Fakta
Endamálsorðingin í samstarvsavtaluni millum Fróðskaparsetur Føroya og Landssjúkrahúsið er soljóðandi:
Endamálið við hesi avtalu er at menna heilsuvísundaliga gransking, menning og útbúgving í Føroyum. Avtalan skal skipa samstarvið millum LS (Landssjúkrahúsið, red.) og Setrið við greiðum ásetingum viðvíkjandi innihaldi og mannagongdum og verða ein karmur um víðari menning av samstarvinum.
