Longu eftir einum minutti var Todi Jónsson nær við at skora, tá Fremad Amager í gjár spældi móti Frem. Todi var ein støðug hóttan móti verjuni hjá Atla Danielsen og liðfeløgunum í Frem, og hann legði eisini upp til einsamalla Fremad-málið, sum Ali Aliji skoraði.
Nóg mikið til stig var hetta tó ikki. Við málum frá Wassim El Banna, Tommy Olsen og Martin Jeppesen vann Frem dystin 3-1. Serliga hevði Frem eitt gott tak á dystinum stóran part av seinna hálvleiki, og tí var sigurin uppiborin, verður sagt á heimasíðuni hjá Fremad Amager.
Tem Hansen, Todi Jónsson og Jónas Tór Næss byrjaðu allir á vøllinum fyri Fremad Amager. Í 67. minutti kom Andrew av Fløtum inn fyri Toda Jónsson. Hjá Frem spældi Atli Danielsen samfullar 90 minuttir á miðvøllinum.
Fremad Amager er nú bert eitt stig oman fyri niðurflytingarstrikuna. Næsti dysturin verður á útivølli móti HIK, har komandi Fremad-venjarin, Jakob Friis-Hansen, enn er venjari.
