Atlantsflog og Malmø Aviation hava í dag undirskrivað ein sáttmála um, at svenska flogfelagið frá august langtíðarleigar seinasta flogfarið av slagnum RJ-100 frá Atlantsflogi.
Leigutíðin er 17-30 mánaðir, sigur Atlantsflog í fráboðan í dag. Hetta hevur við sær, at seinasta flogfarið av slagnum BAE Avro RJ-100, er á veg úr flotanum hjá Atlantsflogi.
Felagið avgjørdi fyri nøkrum árum síðani at seta eina tilgongd í verk, har eldru flogførini skuldu úr flotanum, og at felagið ístaðin skuldi útvega sær flogfør av slagnum Airbus 319. |
Tá ið seinasta av eldru flogførunum er farið úr flotanum, hevur Atlantsflog ræði á trimum Airbus 319, tveimum BELL 412 tyrlum, og einari tyrlu av slagnum AW 139, sum flogfelagið leigar í mars til at brúka í frálandavinnuni í 2014.
- Framtíðarflotin hjá Atlantsflogi er natúrligur partur av strategiarbeiðinum, ið er farið í gongd, og sum verður liðugt í juni. Leigumálið við Malmø Aviation ávirkar ikki ætlaða ársúrslitið hjá Atlantsflogi fyri 2014, sigur felagið.
Atlantsflog fleyg frá fyrsta degi við BAE-flogførum. Tey eru so líðandi farin úr flotanum, eftir at Atlantsflog fór yvir til Airbus 319.
