Í samrøðu við russiska sjónvarpið Russia Today avsannar sýriski forsetin, Bashar al-Assad, allar ákærur um, at hann og stýri hansara hava framt krígsbrotsverk. Hann sigur, at stjórnarherurin hevur úr at gera við at berjast ímóti yvirgangi.
-Vit stríðast ímóti yvirgangi, og vit halda orðini í grundlógini, sum áleggja okkum at verja tað sýriska fólkið, sigur Assad við Russia Today. Hann leggur afturat, at uttan stuðul frá tí sýriska fólkinum hevði stjórnarherurin ikki staðið seg í bardøgunum.
Mannarættindaráðið hjá ST hevur sett eina nevnd at kanna skuldsetingar um brot á mannarættindini í Sýrialandi, men higartil hava myndugleikarnir í Damaskus ikki viljað givið nevndini innferðarloyvi. Millum nevndarlimirnar er fyrrverandi ákærin í krígsbrotsmannadómstólinum í Haag, Carla del Ponte.
