B68 FYRIREIKING
Hóast vit skulu spæla í næstbestu deildini, so fyrireika vit okkum sum um, at vit skuldu havt átt pláss í bestu deildini. Hetta var boðskapurin hjá formanninum, tá ið B68 fyri einum mánaði síðani hevði ársveitslu.
B68 viðhaldsfólkini vóru spent at frætta, hvussu felagið fer at brynja seg næsta ár, men tá var einki at frætta. Einki uttan tað at tað millum veitslugestirnar vóru spælarar, sum áður hava spælt við B68, og at tað av fleiri varð mett sum ábending um, at teir vóru aftur á veg á Svangaskarð.
Í fyrradagin visti B68 heimasíðan at siga, at ein av fyrrverandi B68 spælarunum nú fer aftur at spæla í barndómsfelagnum. Talan er um Arnbjørn Danielsen, sum fleiri av mongu teimum seinastu árunum hevur verið í B36. Sambært b68.fo hava B68 og Arnbjørn Danielsen skrivað undir tvey ára samstarvsavtalu. Arnbjørn var í B68 í 2002, men síðsta kappingarár var hann aftur í B36.
Ofta plagar tað at vera soleiðis, at talan er um fráflyting, tá ið eitt lið flytir niður. Av teimum, sum spældu við B68 í fjør, er tað greitt, at Herbert í Lon Jacobsen er fluttur til B36, og at ein av brasiliumonnunum, Morinio, og bulgarski spælarin, Stanislav Stankhow, ikki fara at spæla á Toftum næsta ár. Einki hevur verið at hoyrt um, hvussu tað verður við Mikkjal Thomassen, sum í fjør spældi á Toftum. Seinna partin av kappingarárinum var Meinhardt Joensen úr Klaksvík málverji hjá B68. Nú fer hann at spæla í Gøtu.
Tveir brasiliumenn, Fabricio og Andersson, fara næsta ár aftur at spæla við B68.
Enn hevur einki verið at frætt um, hvør skal venja B68 næsta kappingarár. Seinna partin av síðsta kappingarári hevði Trygvi Mortensen ábyrgdina av B68 liðnum. Tað er greitt, at hann fer ikki at halda fram á Toftum, tí hann hevur skrivað undir sáttmála, sum ber við sær, at hann verður venjari hjá NSÍ.
