Triðji G! festivalurin skal haldast í Gøtu í summar, og fyrireikingarnar til festivalin eru langt síðani byrjaðar.
Í fjør var tal Laufey Blåsvær, sum var samskipari av festivalinum, men hon hevur borið seg undan at standa fyri festivalinum aftur hesaferð. Tí hava fyrireikararnir av festivalinum sett nýtt fólk sum samskipara, og valið er fallið á Annlis Bjarkhamar.
Hon er kanska kendast sum politikari ? fyrrverandi landsstýrismaður í mentamálum ? men hon var eisini ein av teimum, sum stóð fyri tiltøkunum Free Føroyar, tá ið tey vóru á skránni fyri tveimum og trimum árum síðani.
? Eg havi arbeitt saman við Annlis fyrr, so eg veit, at hon loysir sínar uppgávur til lítar. Hon brennir fyri tí, sum hon fer í holt við, so hon er júst rætta fólkið til G! festivalin, sigur Jón Tyril, sum er formaður í Grót, sum skipar fyri festivalinum.
Nógv vaksin
G! festivalurin hevur verið hildin tvær ferðir higartil. Fyrst ferð var í 2002, og tá var talan um eitt lítið og fittligt tiltak á sandinum í Gøtugjógv eitt kvøld. Nøkur føroysk og smærri útlendsk nøvn vóru á skránni, og talan av var um eitt hugnaligt kvøld, sum fólk tóku væl undir við.
Í fjør eksploderaði festivalurin til nakað heilt annað ? ja, ein rættiligan festival. Nógvir útlendskir bólkar komu til Gøtu at spæla, og eisini stór føroysk nøvn vóru á skránni.
Festivalurin vardi í fýra dagar, har tyngdin lá á fríggjakvøldinum og serliga leygarkvøldinum, tá ið høvuðsnavnið úr Finnlandi, Bomfunk MC´s, spældu fyri stórari mannfjøld.
Umframt framførslurnar á pallinum á sandinum í Gøtugjógv, vóru ein annar pallur á spæliplássinum í bygdini, og dansitiltøk vórðu eisini í ítróttarhøllini á Kambsdali og í Mentanarhúsinum í Fuglafirði.
Bara í Gøtu hesaferð
Annlis Bjarkhamar er farin í gongd við fyrireikingarnar til G! festivalin, og hon hevur nógv, sum hon skal fáa at passa saman.
? Uppgávan hjá samskiparanum er at fáa alt at ganga upp. Hon skal finna ábyrgdarfólk til tær ymsu uppgávurnar, og annars halda í øllum teymunum, sigur Jón Tyril, formaður í Grót.
Ætlanin er, at G! festivalurin hesaferð verður eitt sindur minni spjaddur. Grót ætlar, at øll tiltøkini skulu verða í Gøtu.
? Hetta fer at hava við sær ein betri festival, sum verður meira savnaður á einum staði. Og tað fer eisini at gera tað lættari at skipa fyri, sigur Jón Tyril.
Færri útlendsk nøvn
Í fjør var ein ørgrynna av útlendskum nøvnum og spældi á G! festivalinum. Talan var um okkurt einstakt kent navn, men fleiri av nøvnunum vóru lítið kend millum breiða almenningin.
Hesaferð verða útlendsku nøvnini væntandi færri í tali.
? Vit ætla at fáa færri, men kanska eitt sindur dýrari nøvn til Gøtu at spæla, sigur Jón Tyril.
Hann vil ikki siga nakað um, hvørji nøvn arbeitt verður við. Hóast tað ljóðar sum, at okkurt er á veg, so er enn einki navn alment.
? Vit fáa nógvar fyrispurningar um festivalin, og tað tykist sum um festivalurin er kendur uttanlands. Vit hava fingið onkran fyrispurningin heilt úr India.
G! festivalurin 2004 verður hildin í Gøtu í døgunum frá 16. til 18. juli.
