Tingfólkini hjá Framsókn og andstøðutinglimirnir fýltust í gjár á, at Landsstýrið nú í evstu løtu kemur við broytingum til fíggjarlógina, júst sum harðast leikar á fyri at fáa fiskivinnunýskipanina samtykta. Fleiri enn ein tinglimur hava róð upp undir, at talan er um rossahandlar, har stuðulin hjá einstøkum politikarum verður keyptur.
Ruth Vang, tingkvinna fyri Framsókn og forkvinna í Fìggjarnevndini, vísti millum annað á tað eftir hennara tykki sera óvanligu umbønina um átta milliónir krónur til tól á Suðuroyar Sjúkrahúsi.
Hetta hevur fingið eina aðra kvinnu í politisku skipanini at ressast við, nevniliga borgarstjóran í Havn.
Hon heldur, at nú ávís tingfólk megna trýsta Føroya Landsstýri á hendan hátt er einki í vegin fyri, at tingfólkini úr Havn ikki eisini gera tað sama.
- Nú alt er til fría sølu i Løgtinginum, har tingfólk verða keypt til ymiskt fyri at taka undir við fiskivinnuuppskotinum, so vóni eg at tingfólkini úr Havnini krevja sítt, skrivar Annika Olsen á Facebook-vanga sínum.
Hon hevur meginpartinum av árinum verið í eini drúgvari orrustu við Henrik Old, landsstýrismann í samferðslumálum, um innkoyringarvegin til Havnar og gjørdist eftir egnari útsøgn sera vónbrotin, tá hon sá, at landsstýrismaðurin einans hevði játtað 8 milliónir krónur til vegin í 2018.
Tí heitir hon nú á tingfólkini úr Suðurstreymoy at streingja á, fyri at fáa økt hesa játtanina, í býti fyri at stuðla fiskivinnunýskipanini hjá samgonguni.
7 av teimum 16 tingfólkunum í samgonguni eru búsitandi í Suðurstreymoy, umframt at Annika Olsen og Magni Arge bæði er í farloyvi úr tinginum. Tað er Helena Dam á Neystabø eisini, í hennara stað situr Hilbert Elisson úr Vestmanna. Fýra av teimum sjey landsstýrisfólkunum eru eisini úr høvuðsstaðnum, umframt at løgmaður býr í Hoyvík. Afturat teimum stuðlar Sonja Jógvansdóttir, eisini búsitandi í Havn, eisini fiskivinnunýskipanini.
Tey sjey tingfólkini í samgonguni eru:
Heðin Mortensen
Kristianna Winther Poulsen
Djóni Nolsøe Joensen
Annita á Fríðriksmørk
Katrin Kallsberg
Bjørt Samuelsen
Ruth Vang
