Føroyski landsliðsleikarin, Andrias Edmundsson spældi allan dystin, tá hann og liðfelagarnir í Chojniczanka taptu 1-2 fyri Stomil Olsztyn á útivølli í triðbestu pólsku fótbóltsdeildini.
Stomil Olsztyn var á odda 2-0 í steðginum. Tomasz Mikolajczak minkaði um munin fyri Chojniczanka við einum brotssparki í 76. minutti, men nærri kom Chojniczanka ikki at fáa stig í dag.
Chojniczanka er triðaftast í deildini við fimm stigum fyri sjey dystir.
Tað hevur vakt ans í Pólandi, at ein leikari sum spælir í triðbestu pólsku fótbóltsdeildini møguliga skal spæla móti Pólandi 7. september.
Í samrøðu við Radio Gdansk sigur Andrias Edmundsson: - Dysturin hjá okkum móti Pólandi verður sera torførur, men tað er ikki ógjørligt at vinna á Pólandi. Fyri stuttum tapti Póland fyri Moldova, og tað gevur okkum eina vón. Men tað verður avgjørt torført at steðga Lewandowski og øllum tí pólska liðnum. Póland hevur fleiri áleyparar í heimsflokki. Tað verður ein torfør, men stór uppliving fyri okkum, sigur Andrias Edmundsson.
