Í kvøld veit Reuters at siga, at amerikanski uttanríkisráðharrin, Antony Blinken, fer til Ísraels hósdagin.
- Hetta er ein boðskapur um solidaritet og stuðul, sigur Matthew Miller, sum er talsmaður fyri amerikanska uttanríkisráðið.
Í kvøld segði amerikanski forsetin, Joe Biden, á tíðindafundi, at Ísrael hevur rætt til at verja seg eftir ógvusligu álopini seinastu dagarnar.
Forsetin vísti á, at USA í 75 ár hevur verið stuðul hjá ísraelska fólkinum, soleiðis at ræðuleikarnir móti jødunum ongantíð fara at henda aftur.
- Vit standa framvegis øksl um øksl við Ísrael, og vit vilja tryggja, at demokratiski staturin hevur alt, sum landinum tørvar fyri at verja seg, segði Joe Biden.
