Ein avtala millum amerikanska tjóðbankan og American International Groupm bjargar tryggingarfelagnum undan húsagangi American International Group hevði boðað frá, at fekk felagið ikki einar 80 milliardir dollarar í kreppuláni, noyddist tað at gevast við virksemi sínum í dag.
Men í nátt kunngjørdi tjóðbankin, FED, at hann og AIG høvdu gjørt eina avtalu, sum forðar fyri, at tryggingarfelagið fer á húsagang.
Avtalan ber í sær, at American International Group lænir 85 milliardir dollarar úr tjóðbankanum, sum afturfyri yvirtekur 80 prosent av felagnum.
Ein kelda í FED sigur við fjølmiðlarnar, at tað var neyðugt at bjarga AIG. Hevði felagið farið av knóranum, hevði tað fingið uppaftur størri avleiðingar, enn tá íløgubankin Lehman Brothers fór í gjaldssteðg, sigur keldan.
