Altjóðagerðin og vinnu­politikk­urin í miðdepilin

Á triðja evnisdegi Tjóð­veldisfloksins undir heit­inum »Koma og ávirka« var vinnu - og alheimspolitikkur Tjóð­veldisfloksins viðgjørdur.
- Í hølunum hjá ar­­beið­arafelagnum Hædd­ini hevði Eysturoyar Tjóðveldisfelag fyrireikað evnisdagin  sum var ser væleydnaður og væl­­mannaður, sigur Tjóð­­veldisflokkurin í tíð­indaskrivi.
Stevnumið floksins verða á hesum evnisdøgum endurskoðað, har nýggj fólk sleppa framat við at­finningum og nýhugsan og nýggj uppskot koma á borðið.
Saman við fram­søgu­fólkum floksins hava ser­frøðingar innlegg um evnini, sum eru til við­gerðar.
Tórbjørn Jacobsen hevði eitt innlegg um vinnupolitikkin hjá flokkinum  fjøltáttað og sjálvberandi vinnulív. Høgni Hoydal legði fram um alheimspolitikkin í stevnumiðunum.
Gordon Ejdesgaard, bú­­skaparfrøðingur, hevði síðan fyrilestur um vinnupolitikkin við serligum atliti til ein­skiljingar og vandar­nar fyri at spæla sær týdingarmikil virði av hondum.
Jan Mortensen, stjóri í Vinnuhúsinum, tosaði um alheimsgerð og mill­umtjóða avtalur, har hann vísti á møguleikarnar við altjóðagerð og ein­skiljingum, sum hann metti at føroyingar ikki skulu ræðast.
Ólavur Gregersen, vinnu­lívsmaður, legði síðani fram sínar hugsanir um vinnuligu avbjóðingarnar hjá føroyska samfelagnum við serligum denti á at fáa útbúgvið fólk og vitan at vaksa í føroyskum vinnu­lívi.
Ein røð av uppskotum vórðu orðað, sum serliga løgdu dent á hesi mál:
at føroyingar skulu styrkja sín altjóða førleika og altjóða samstarv á øllum økjum
at Føroyar, Ísland, Grøn­land og Noreg eiga at ger­ast eitt fríhandilsøki og standa saman um sátt­málar við ES og aðrar fe­lagsskapir
at einskiljingar skulu fremj­ast við greiðum treytum soleiðis, at føroyskt vinnu­lív mennist og kastar av sær til føroyska samfelagið.  Og ikki eftir tí tilvildarligu leið, sum landsstýrið tykist ganga, ið kunnu elva til »russiskar tilstandir«, har stór virði verða givin burtur og avkastið sent av landinum.
at fiskiloyvi og aliloyvi skulu bjóðast út umvegis ein almennan banka og avkastið skal koma land­inum til góðar

Á fundinum kom fram, at tingbólkur Tjóð­veld­isfloksins í næstum fer at leggja síni boð fram á ting um almennu veiðiloyvini, sigur Tjóðveldisflokkurin at enda í tíðindaskrivi.