Navn hansara er Tim Dodson. Hann er ikki amerikanari soleiðis sum vælklingandi navnið kundi bent á. Men hann er virkin í oljuvinnuni, altjóða oljuvinnuni. Og hann er norðmaður. Tim Dodson er ikki ein og hvør í altjóða oljuvinnuni. Hann stendur á odda fyri allari oljuleiting hjá norska oljurisanum StatoilHydro kring heimin herundir eisini leitingini við Føroyar. Undir honum arbeiðir m.a. føroyski oljusstjórin Rúni M. Hansen úr Fuglafirði. Herfyri hittust teir báðir, Tim Dodson og Rúni Hansen í London saman við ongum minni enn føroyska oljumálaráðharranum Johan Dahl, sum var á almennari vitjan í bretska høvuðsstaðnum eitt nú fyri at kunna seg um framtíðar ætlanir í økinum millum Hetland og Føroyar.
Sosialurin fekk orð á Tim Dodson eftir fundin við Johan Dahl. Hann sigur, at teir kunnaðu landsstýrismannin um virksemi hjá StatoilHydro kring heimin, her eisini Føroyar. –Vit eru sera fegnir um at hava fingið so mong leitiloyvi og ikki minst tað seinasta frá 3. útbjóðing, nr. 16, har vit nú fara at skjóta seismikk. Vit hava framvegis vónir um at finna olju og gass við Føroyar.
Satsa uppá Føroyar
-Nú hevur eitt stórt oljufelag sum BP gjørt av at taka seg úr Føroyaøkinum. Hvussu ber tað til, at eitt felag sum StatoilHydro kortini velur at brúka nógvar pengar her?
-Nú er munur á, hvar oljufeløgini velja at gera íløgur. Tað finnast fleiri váðilig og nýggj leitiøki kring heimin, og her mást tú so velja tað ella tey burtur úr, har tú metir bestu møguleikar vera at finna olju og gass. Og her hava vit hjá StatoilHydro valt at satsa uppá Føroyaøkið sum eitt av teimum meira váðiligu økjunum, tí vit trúgva uppá, at her finst kolvetni í undirgrundini. Og at møguleikar eru at gera stór fund.
-Hvussu leingi kunnu tit vera her uttan at hava gjørt nakað rakstrarverdugt fund?
-Vit hava skotið nógvan seismikk og hava nakað herfyri borað ein brunn, har vit ikki hava testað tað økið, ið vit fóru eftir, so her er enn nakað arbeiði at gera. Vit miðja móti at bora í minsta lagi ein brunn aftrat fyri finna út av, um hesir strukturnarnir, sum vit hava lagt okkum eftir at kanna, goyma kolvetni.
Tim Dodson sigur, at teir hava ikki enn gjørt av nær og hvar teir fara at bora tann komandi brunnin á føroyska landgrunninum, men teir hava kunnað landssstýrismannin um, at teir ætla at bora ein brunn í næstu framtíð. Um tað verður í 2010 ella 2011 ynskir Statoilstjórin ikki at gera viðmerkingar til. –Vit vilja sjálvandi útvega okkum so nógvan seismikk sum tilber fyri harvið at finna júst tað besta staðið at seta borin í.
Altjóða leitistjórin hjá StatoilHydro dylur ikki fyri, at teir meta alt økið millum Føroyar og Hetland sum eitt týðandi framtíðar leitiøki fyri fyritøkuna. Og her liggur føroyski landgrunnurin frammaliga. Her er sjálvandi talan um høgan váða, men møguleiki er afturfyri eisini at gera stór fund.
Fegnir um føroying í leiðslu
Vit spurdu at enda hvønn týdning tað hevur fyri StatoilHydro, at har eisini finst ein føroyingar ovarliga í leiðsluskipanini, nevniliga Rúni M. Hansen, sum stendur á odda fyri leiting í Norðurafrika og Norðureuropa!
-Vit leggja okkum eftir at hava lokal fólk, har vit arbeiða. Og tí fegnast vit um at hava Rúna M. Hansen við í okkara arbeiði. Hann hevur so víst, at hann hevur dugað at handfarið hetta at bora brunnar. Tað boriarbeiði, sum er gjørt í Føroyum higartil, hevur verið gjørt við sera hepnari hond. At vit ikki hava funnið olju er so nakað annað. Tað er tað vit nú fara eftir í komandi brunni.
